- 457 -

1412. Febr. 3. Liegnitz.

Herzog Wenzel Bischof zu Breslau, gestattet dem Rath von Liegnitz, 56 Mark seines auf der Stadt haftenden Erbgeschosses zu verkaufen.

Wir Wenczlaw von gotis gnaden bischoff czu Breslaw in Slezien herczog vnde hirre czu Legenicz .. bekennen offentlich mit desim brieffe allen den, die en sehen, horen adir lesen, das wir vnsere swere schaden czu vormeiden vnde vnsern fromen groslich czu schaffin vnde czu werbin, mit rate vnser getrawen eldisten, ernstlichin bevolen vnde geboten haben den erbarn wiczen burgermeistere vnde ratmannen, den eldisten, den geswornen aws allen hantwerken vnde der ganczen gemeyne vnser stat Legenicz vnsern lieben getrawen, das sie von vnser wegin vorkewfin sulden sechs vnde vumfczig mark geldis jerlichis czinsis vnsers erbgeschosses, das wir jerlich off der vorgenanten vnser stat Legenicz haben, dy eyns seligen gedechtniss der erlawehte ffurste herczog Ruprecht eczwenne hirre czu Legenicz vnser lieber bruder czu im wedir gekawft hatte, dy noch seyme thode an vns komen waren, ydem manne, der die selbin kewffin welde, frawen alzo mannen, czu jerlichem czinse iczliche mark czinse vm czwelff mark Pregischer grosschin Polnischer czal czu rechtem wedirkawffe, auch haben sie derselben czinse vier vnd vierczig mark yczunt vorkawfft, von vnserm gebote vnde czwen noch vorkewffin sullen, so haben sie Hanse Gawin czehen mark auch der selbin czinse auch von vnserm gebote vnde bevelunge globit vnde vorschrebin, der sy iczunt von vnser gunst den erbern vnd weyzen Nickeln Vyaw vorbas vorkawfft hat, das selbe gelt vnde pfennynge, dy man vm dy egenanten czinse gegebin hat, vnd noch gebin sal, sy gancz vnd gar vor uns den, an dy wir sie geweyzet habin, beczalit habin vnde vorrichtit, vor sulche schulde, dy vnser vorgenanter bruder, dem got gnade, noch seyme thode schuldig blebin ist. Auch irlewben wir vnde beuelen den vorgenanten burgmeister vnde ratmannen vnser sttat Legenicz, dy iczunt sint, vnde ouch hernochmols in czukunftigen czeiten gekorn vnde seyn werdin, ap sie die vorgenanten vnsere czinse vnde auch ander vnser czinse vnsers erbgeschosses, der do mitenander seyn dreyhundirt mark vnde monczegeldis, des do ist dreysig mark, dy wir jerlich haben uff obgenanter vnser stat Legenicz, dy ouch vormols vorkawft sint, ymande wedir abekewffen wollin, do sy nicht gerne her geben wollen, das sy dy wedirkewffin vnd abelozen mogen, wen sie vnd alz offte, alz sy des czu rate werden vnd mogen sy andern lewten vorbas vorkaufen, wem sy wellin, gleicher weyze alz vore. Auch welle wir vns vnd vnsern nachkomen erbhirren czu Legenicz vnsern vngehinderten wedirkawff der selbin geschosse, monczegeldis vnd czinsis behalden, kegin allen den, den dy selben czinse vorkawfft sint adir vorkawfft werden, wen wir das czu rate werden. Auch globen wir vor vns vnd vnser nochkomen erbhirren czu Legenicz denselben vnsern getrawen lieben burgermeistern vnd ratmannen, das wir ydem manne, den sie dy selben vnser geschos vnd monczegeld vorkewffin adir den sy vormals vorkawfft sint, lossen wellen bey seyner briffe lawte, dy sy den lewten obir dy czinse gebin vnd gegebin haben in allen lawten, vorbindungen, globden, artikiln vnd puncten, als sy ire briffe vnder der stat Legenicz ingesegile dor obir gebin vnd gegebin haben vnd wollen mit vnsern nochkomen erbhirren czu Legenicz alle lewte, dy dyselben geschos vnd monczegeld kewffin vnd gekawfft haben, in crafft desis bryfis gnediclichin bey den selben czinsen behalden vnd schutczen noch irre briefe lawte, dy sie von der oftgenanten stat Legenicz obir dy vorbenanten czinse haben werden. Des czu bestetunge vnd czu zicherheit habin wir vnser cleyne des landis ingesegil czu Legenicz an desen brieff lossen hengin. Noch gotis gebort virczenhundirt jar der noch im czwelfften jare an der nehesten metewoche vor sente Dorotheen tage. Do bey sint gewest vnser liben getrawen Hans Gawyn, heuptman czu Legenicz, Glogrian von Rathenaw vnser marschalk, Petir von Gawsk, Nickel Medegaw vnd von sunderlicher vnser bevelunge hat Conrad Gawyn desin brieff geschreben.

O. d. St. L. No. 237. Dat Siegel fehlt. — Bitschens Privilegb. f. CXXXIXb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866